KHUTBAH JUMAT; BAHASA JAWA

Agama Ingkang Sampurna

            Manungsa dipun ciptakaken dening Allah SWT kanthi tujuan ingkang luhur lan mulya inggih punika supados dados khalifah fil 'ardh (pengganti peran Allah ing salumahing bumi) ingkang tugas lan fungsinipun makmuraken bumi saisinipun. Pramila manungsa dipun bekali akal ingkang mboten dipun paringaken dhateng makhluk sanesipun. Ing pangajab kanthi akal punika manungsa saged makarya, berkreasi, berinovasi kangge mujudaken bumi punika majeng, adil, lan makmur.

            Ananging kangge ngrembakaken fungsi akal punika manungsa ngadhepi tantangan ingkang mboten entheng. Awit ing lebeting dhiri manungsa punika ugi wonten nafsu ingkang kasunyatanipun condhong ngajak dhateng tumindak ingkang awon, nistha, lan munkar. Pramila ing dalem ngayahi gesang punika manungsa ngadhepi paprangan antawisipun akal lan nafsu. Menawi akal menang, manungsa bakal mulya. Kosok wangsulipun menawi nafsu ingkang menang, manungsa anjlok derajatipun malah langkung andhap tinimbang kewan.

            Manungsa lahir mboten dipun umbar dening Allah SWT. Kangge ngrembakaken fungsi akal lan ngendhalekaken sepak terjang nafsu, Allah SWT nurunaken agama kangge pepadhang gesang manungsa. Manungsa menawi sampun pikantuk hidayah utawi nurullah insya Allah tandang tandukipun condhong dhateng tumindak ingkang positif lan paring piguna tumrap bebrayan agung. Akal dipun manfangataken kagem menggalih ciptaan Allah lan kemajengan gesang, mboten kagem ngakali sapadha-padha.

            Agami Islam ingkang kita anut punika mujudaken agami ingkang sampurna. Allah SWT ngendikaken ing Surat Al-Maidah ayat 3 ingkang suraosipun: "Dina iki, Ingsun wis nyempurnakake agamaira kabeh, lan nyempurnakake nikmatira kabeh, lan Ingsun uga ridha agama Islam dadi agama kang padha ira rungkebi." Ugi Islam mujudaken agami ingkang dipun akeni dening Allah kados pangandikanipun ing Surat Ali Imran ayat 19: "Sejatine agama kang den akoni ana ing ngarsane Allah Taala iku mung agama Islam." Wonten ing ayat sanes ugi dipun ngendikaken: "Sing sapa wonge nuprih agama saliyane agama Islam dheweke ora bakal ketrima lan ana ing akherat bakal kapitunan." (QS Ali Imran ayat 85).

            Islam sinebat agami sampurna awit mengku pitedah gesang ingkang lengkap, ajaranipun mboten winates wekdal lan papan panggenan, saha jumbuh kalayan tabiat lan fitrah kedadosan manungsa. Dipun sebataken ing Surat Ar-Rum ayat 30: "Mula sira jejegna adhepira marang agama sarana condhong temenan marang agama iku, tetepana fitrah Allah (dhasar agami Islam) kang Allah Taala wus nitahake sekabehane manungsa iku, ora kepareng ngowah-owahi marang titahe Allah mau. Iyo mengkono iku agama kang jejeg, ananging akeh-akehe manungsa ora padha mangerti (nyawijekake marang Allah).

            Akhir-akhir punika kita estu prihatos, awit wonten saperangan tiyang utawi kelompok ingkang njarag badhe ngosak-asik, ngacak-acak kesucian utawi kemurnian agami Islam. Menawi umat Islam tipis iman lan keyakinanipun temtu badhe terombang-ambing utawi gampil goreh ing dalem ngadhepi kawontenan punika. Kita temtu taksih emut, wonten oknum ingkang ngaku-ngaku dados nabi, malaikat, juru selamat, al masih al maw'ud lsp.

            Kita kedah mbudidaya ningkataken ilmu, pangertosan, lan wawasan babagan agami Islam supados kita sangsaya mantep anggen ngrungkebi agaminipun Allah punika. Menawi prinsip-prinsip agami sampun kita ugemi insya Allah kita bakal wilujeng sinaosa zaman berubah. Pramila mangga kita ajegaken anggen nderes Al Qur'an, mangga kita regengaken majlis taklim lan kegiatan agami ing lingkungan kita masing-masing.

            Kangge nylametaken umat, njagi akidah umat, lan mbentengi umat saking pengaruh negatif ingkang bakal ngrisak keutuhan Ukhuwah Islamiyah, Majlis Ulama Indonesia minangka songsong agung tumrap umat Islam sampun ngrumusaken 10 (sedasa) kriteria kangge nitik pundi kemawon aliran utawi faham ingkang nyimpang/nyempal saking pokok-pokok ajaran Islam:

1.      Ngingkari rukun iman ingkang cacahipun 6 lan rukun Islam ingkang cacahipun 5.

2.      Ngyakini lan utawi ndherek akidah ingkang mboten jumbuh kalayan tuntunan Al Qur'an saha Sunnah.

3.      Ngyakini tumurunipun wahyu sasampunipun Al Qur'an.

4.      Ngingkari keaslian lan utawi kebenaran isi al Qur'an

5.      Nafsiraken Al Qur'an mboten ngginakaken kaidah tafsir.

6.      Ngingkari fungsi Hadits Nabi minangka sumber ajaran Islam.

7.      Melecehkan lan utawi ngremehaken para nabi lan rasul.

8.      Ngingkari Nabi Muhammad SAW minangka nabi lan rasul terakhir.

9.      Ngewah-ewahi pokok-pokok ibadah ingkang sampun dipun temtokaken dening syariah, kadosta haji mboten perlu dhateng Makkah, sholat mboten kedah 5 wektu lsp.

10.  Ngafiraken sesami tiyang Islam tanpa dalil syar'i.

Salajengipun faham Islam ingkang dipun nut mayoritas umat Islam Indonesia inggih punika faham ingkang badhe mujudaken watak ajaran Islam ingkang rahmatan lil 'alamin ingkang ciri-cirinipun inggih punika:

1.      Tawassuth lan i'tidal (tengah-tengah) inggih punika sikep memahami agami kanthi moderat, mboten ekstrem.

2.      Tasamuh (toleran) inggih punika nampi lan menghargai perbedaan pendapat kanthi jembar dhadha ananging dipun iringi sikep lan teguh pendirian.

3.      Tawazun (seimbang) inggih punika mawas fenomena gesang saking pinten-pinten sudut pandang, lajeng mendhet posisi seimbang sarta proporsional.

4.      Amar makruf nahi munkar, inggih punika ngajak dhateng kesaenan lan nyegah tumindak munkar.